唔寫Blog的道理

又有一段時間停止寫Blog，除左無能力無精力作為主要原因外，無動力都係其中一個因素。記得以前寫Blog最多的時候並唔係處於一啲好的光景，相反係選擇有最多負能量的時候執筆，原因係有怨無路訴，有憂無人分。發現左呢點之後，曾經好積極咁決定要寫返個開心日記，同歷奇夾份寫左個，寫寫下又無寫，無寫當然唔係因為唔開心啦，相反係發現開心的野係好難好有組織咁去寫，因為快樂總係容易忘記。

唔知有無人同我一樣，發現其實寫Blog的過程並唔愉快，因為要好努力咁去刻劃同組織，第一個辛苦就係工餘時間仲要用腦，第二個辛苦就係個過程牽涉諗好多負面野，越想寫得慘就越會寫得多，越寫得多就越諗得慘野多，越要寫得仔細就越覺得自己要委屈過世。所以我停止左寫Blog，寧願upload下相就算。

當然唔寫唔代表無野煩，事實就好多野煩，不過都係唔比自己諗太多啦。