愕然回首

經馮小姐提起，發現我屋企近年的景況無乜平靜過。我自己一路唔察覺，就係所謂的當局者迷。

中二三的時候，屋企都算富足，每日有大概50蚊的洗用，禮拜尾又有奶粉打斧頭津貼(細個成日駁命飲奶，因為屋企無奶的時候就可以問阿媽科一舊水買奶，係唔洗找錢嘅)，當時基本上都要乜有乜，好早就有得上網、有手提電話用。到中五的時候，屋企的經濟就開始回落，回落到要馮小姐幫我交7百幾蚊電話費(多得佢，令我的電話號碼沿用至今)。到預科的時候仲淒涼，因為唔生性要轉到老遠的馬鞍山讀書，唔知有幾多日要同阿媽交換銀紙「扎」袋，要擔心屋企無錢比我搭巴士返學。校務處的程小姐每個月都要嗌咪召見我，同學仔以為係學生會會長有大事幹，其實程小姐只係想追我交學費，最終捽之要同學校申請學費減免延期先讀得完預科。之後有運仔，上得到副學士，入到我老豆最想我讀的夕陽工業系，注定我由細到大都係要食呢行飯。大專時期的屋企經濟有啲起色，有錢洗、有宿舍住、有莊上又有女媾，都叫做體驗過大學生活。可惜好景不常，沙士之後的建造業蕭條，畢業後頭一年幫我老豆手做左幾張蝕水的合約，重發現屋企原來一早空空如也，甚至負債累累，蝕緊的已經唔係自己錢，係一班忠心伙記的血汗錢，正一「有汗出，無糧出」，喺咁的景況下，我開始主動入主屋企，幫屋企做左項重大決定，將歪念糾正，盡量減低負擔，就係賣樓兼著草。後來遇到黎老闆，比左張有得做的合約我兩仔爺，喺我全盤心機時間投放下(同樣女朋友都要放下)，終於回復收支平衡，可以間中過吓荒唐的生活，每星期去酒吧飲酒，隨便追下女仔花費吓，但最終喺合約尾的時候都因為資金週轉不靈而舉手宣佈投降，就係嗰時我對做生意產生嚴重的恐懼，並計劃要從此脫離風浪好大且又雜亂無章的父親生意，要脫離佢可能會遺留比我的債務，要過吓平穩的打工仔生活。就係咁，黎先生用比較高的市場價格收購左我，打工打左一年，呢一年期間，我老豆生性左，喺我勤導下，佢的生意無玩得咁大，同人合作的模式亦簡單左，屋企整體都如我所願咁平靜左。直到上年8月，又唔知點解有人同我老豆針大茶飯，又整左張疑似好搵食又好需要腦力的合約我老豆嘆吓，終於我老豆又不甘平凡咁要出去冒險一下。過左平靜一年的我無乜干涉佢，反正佢都無咩可以輸，我自己加埋家姐又維持到頭家，就由得佢咯。又到10月，我老豆打算重新招我入伍，識逢我公司又無咩搞作，我又拍緊拖想要諗未來，喺鬼迷心竅下，我當然無聽我老豆點，因為我知自己同佢唔夾，相反我搵黎生同我另起爐灶，開始迎接呢張疑似有得搵食的合約。開業4個月左右先至啱啱適應落來，點知過完年又突然爆出我老豆患病要榮休的消息，呢個消息令我心思複雜好多，要顧慮佢的健康之餘，又要兼顧埋佢的生意，佢的生意係佢的精神命脈，做緊的呢張合約亦係佢翻生還債的重大寄望，我明白佢的緊張程度，佢無得自己繼續經營落去已經好唔安樂，而我除左「骾」，亦都無咩好打算。

開始發現人的一生好似有好多選擇，但其實好多野係迫倒自己去做，整整下仲相信好多野係整定嘅添。喺上文描述的十年裡面發生左好多野，但中間有好多野係銜接，例如由我老豆開始做樓宇保養，同唔同的人結緣，到我讀唔到書揀唔到科而被迫入讀建築工程系，畢業就順理成章咁幫我老豆手，又發現佢唔係好得而迫使我需要積極參與管理，無啦啦又汲收啲有關經營的皮毛，仲比我認識左早期同我老豆結左緣的黎老闆，比佢知道我的處事行徑，而到我想轉打工的時候，又即刻比黎老闆第一時間接收左我，比我同佢增加彼此的了解，建立日後佢對我的信任。跟住我老豆又接單新合約，想拖埋我落水，正值我當然無事忙所以心血來潮想要闖一闖，偏偏比我背叛的黎老闆仲要肯出錢出力咁支持我，令我有本事成立自己的公司，去嘗試經營運作，喺工程上，又基於我老豆從前的人緣好，連帶負責看管我工程的人員都對我照顧有加，令我可以短期埋位適應。到宜家我打好底，老豆又因病要榮休，又順理成章咁要子承父業，真係好似乜野都安排好哂，冥冥中自有主宰。

人好似經歷左好多，十年來上上落落，學楊千嬅話斎「化」啦，個人好似無左咁多感覺感受，已經無話堅唔堅持，執唔執著，一世人有太多個moment，根本唔需要太在意特別某一個某一刻，因為將來實在有太多個moment驅使你去忘記以前的moment，你記得幾多個丫？咁索性凡事都望下將來，將來開心咪得囉。所以呢，人最緊要係知道點樣令自己開心，而邁向開心的途中總會發生啲唔開心，但當你達到開心時就會自自然然咁忘記，就可以笑看風雲。

道法自然