千言萬語

前晚去左土瓜灣一間偏僻炭爐火煱燒烤食店，幾特別，食材都幾豐富同新鮮，兄弟間總叫做有啲新意。不過我覺得自己成晚都好靜，除左因為要集中精神燒野食外，最主要係摸住成晚都有啲唔舒服的肚仔，應該係啲人咀咒我食多左隻太新鮮的巨型花甲所致。就喺靜英英摸住肚仔的時候，我就留意到我平時唔會注意的電視機。佢喺度播緊「建築有情天」。

建築有情天/晴天？
自從出左來經營自己的業務之後，諗的野多左，體會的野就更加多左。

「情」，生意上，究竟有咩野人會同我有「情」？喺度要首先多謝我的舊老闆同佢的夫人，你兩公婆令我相信建築真係有「情天」，相信世間無人會明白你兩公婆點解要咁做，要對一個同自己完全無親屬關係的小朋友咁好。雖然銀碼對於兩位來講唔多，不過對於我的確係個莫大的鼓勵，亦等於兩位對我工作的認同，對我人格的信任，真係生我出來嗰兩個都未必夠你兩位信我，因為佢地初初都唔信兩位竟然可以咁樣扶我。除左老板兩夫婦外，估唔到連啲判頭都對我有情。大家識我的時候，我都只係奀芝芝的打工仔一名，點解我一出來判野做，你地都可以願意幫我頂咁多數呢？銀行咁恨錢都俾唔到我呢個Credit啦。
開始發現做生意的奇妙之處，我知道大家最終都係向錢看，希望生意有來有往，就係呢個共同的目標，兩檔人真係可以捱義氣，誠信真係可以賣錢，你無錢時，我幫你頂住先，野我幫你做左先，數可以遲啲找，到我無錢，你就點都俾啲我周轉住先，總之就萬事有商量。宜家明白商家們點解可以咁同氣連枝，因為願意賣力賣人情幫我地嘅通常都係自己賣力賣人情幫過的人，試問一個老板又點先可以賣力幫一個打工仔，老板根本無乜時間無乜機會去了解全部打公仔的真切需要，勞資的關係完全建基於錢銀上，勞資雙方先係最公平的交易，合約保護雙方唔需要首先蝕底，咁仲邊有機會有人情賣，邊有機會有誠信講，咁雙方點會唔係喺角力的層面呀。所以打公仔要受賞識，真係要Show off同主動囉。

「晴」，我宜家身處其中，望當然係咁望。不過煩惱同責任都真係好多好多。克服到就係晴天嫁啦。


食飯的時候，雖然肚痛，不過見倒生力有個肥版李冰冰，全晚應該最開心係佢。