有需要嗎？

呢輪一直好忙，忙到根本無心思打日記，今日要打的呢一個，亦從來唔係我心目中的題材，不過倒希望認識我超過十年的朋友有緣睇倒呢個日記。

前一輪無意間得悉一個秘密，心裡面立即有條刺，喺強勁求知慾的驅使下，我嘗試向朋友打探，就係咁，呢個所謂的秘密又多左一個唔需要知的人知啦。朋友得悉後同我的反應分別唔大，同樣被牽起強大的求知慾，朋友更大膽向秘密中的事主追問究竟。事主可能得悉有關事件被披露，當下胡扯過去。

事件敲起左好多唔同人的疑問，有關朋友間的誠信，有關情人對自己的睇法，呢種種的疑問無疑只係將彼此間的芥蒂加深。而呢一刻我最大的問題係「有需要嗎？」呢一刻我問自己，証實左朋友做過的蠢事又點，我要發起運動排擠佢？唔係，我根本無打算過。無打算又四圍問，揚哂人的野出去？我真係無心，純粹係好奇心想知我朋友間係咪有啲我估唔到的人存在。我的問題係點解我要「無心做壞事」？自問唔係富有正義感的人，亦唔係特別喜歡揭人瘡疤的人，咁我究竟做左啲咩呢？大家建立緊的芥蒂就係由我嗰粒唔多起眼的好奇心開始。

有朋友比較剛烈，唔同品格有問題的人做朋友，其實咁又與你何干呢？人地話下一個要來傷害你咩？你覺得朋友有問題，咪自己避忌吓囉，做乜無啦啦搞到其他人陪自己一齊煩呢，人地千絲萬縷的關係可能就係因為自己一粒多餘的好奇心而遭受破壞。有咩野事需要你地班同事件亳無瓜葛的傳聲筒來負責仲裁同制裁？

我覺得我錯啦，錯在向一個無關我痛癢的事件求證，挑起大家不必要的煩惱。有時情侶抑或朋友都一樣，呃呃氹氹就一世，當然我都希望我從來都無聽過任何事件，而最好當然係乜野事都無發生過。